25-oktabr kúni Qaraqalpaqstan Respublikası Avtomobil jolları bas basqarması tárepinen A380 “Ǵuzar-Buxara-Nókis-Beynew” avtomobil jolınıń 964-1204 km (240) bóleginde alıp barılǵan rekonstruksiya jumısları juwmaqlanıwına baylanıslı usı joldıń 1204 km bólegine Press-tur hám baspasóz konferenciyası shólkemlestirildi. 2021-jıl baslanǵan qurılıs jumısları 3 jıl dawamında Ázerbayjannıń «North West Construction LLC» hám Qıtaydıń «CRBC» China Road and Bridge Corporation kompaniyaları tárepinen alıp barıldı.
Joybar boyınsha joldıń ótkeriwsheńlik qábileti artıp, ońlaw hám ekspluataciya qárejetleri derlik 2,5 ese tejeliwi, xalıqaralıq hám tranzit júk tasıw, sonnan, jolawshı tasıw kólemi bir neshe esege artıwı, aymaqlar boyınsha jalpı ishki ónimniń ósiwine erisiliwi kútilmekte.
Joldıń qısqa múddette hám sapalı qılıp qurılıwı press-tur qatnasıwshılarında úlken qızıǵıwshılıq oyattı. Qatnasıwshılar avtomobil jolınıń qurılıw processleri, jumısshı-xızmetkerler ushın jaratılǵan sharayatlar menen jaqınnan tanıstı. Bul avtomobil jolınıń búgingi kúndegi áhmiyeti hám keleshektegi nátiyjeliligi haqqında ǵalaba xabar quralları wákilleri, jurnalist hám blogerlerge maǵlıwmatlar berildi.
🏢Qaraqalpaqstan Respublikası Avtomobil jolları bas basqarması málimleme xızmeti